[台灣話來自日語的借詞舉例] (五) [注文] tsu3-bun5

[台灣話來自日語的借詞舉例]
(本專題使用台語文書寫,標音採用教育部 <臺灣閩南語羅馬字拼音方案>)

 

(五) [注文] tsu3-bun5 (< 日語:注文[ちゅう-もん / chyu-mong])

台語 “注文[tsu3-bun5]" 是台灣佇日治時代對日語借入來的借詞(loan word)。

日語 “注文[ちゅう-もん / chyu-mong]",華語講 “訂購、訂貨"(定購、定貨),英語講 order。華語 “訂貨(定貨)" 已經進入台語詞彙,台語講 ting7-hue3/he3、 tiann7-hue3/he3 (定貨)。但是華語 “訂購" 並無予(hoo7)台語吸收。

日語 “注文[ちゅう-もん / chyu-mong]" 的意義是 : “指定物品的種類、形狀、尺寸等委託製作或者是交付。" ——《廣辭苑》。"「注文」是買主對提供一定物品的生產、運輸、服務等的賣主要求買物件的行為。這種行為會使用口頭、電話、網際網路、傳真等的方式來完成,不過用文書的方式較安全、確實。記載目的物品的品質、數量、價數、交貨時間地點、付款方式等等的文書叫做 「注文書(chyu-mong-syo)。" ——《日本大百科全書》。
日語 “注文" 亦寫做 “註文"。

 

漢語的 “注文" :
漢語嘛有 “注文" 這個詞。漢語的 “注文" 是指對古冊裡面的字句解釋的文辭。親像《孝經注疏》: “若其「注文」未備者,則具存於疏。"
“注文" 亦寫做 “註文"。《康熙字典考證、子部、孰》: “謹按,‵祭祀自孰始′ 乃「註文」,非經文。次序當先經後註。"
日語 “注文" 亦寫做 “註文"。雖然漢語嘛有 “注文"、"註文",伊的意義佮日語的 “注文"、"註文" 無仝(kang5)。日語的 “注文"、"註文" 應該佮漢語的 “注文"、"註文" 無關係,是日本儂家己製造的漢字詞,亦就是 “和製漢語"。

 

日語 “注文" 的理據 :
華語的訂購、訂貨,日語哪會號做 “注文" ? ui3(從)漢字 “注" 佮 “文" 的字義來看,實在僫(oh4; 難)理解。
日語 “注文" 原來是日本古文書的一種,是一條一條記載儂名或者物品種類、數量等的備忘性質的文書。這款文書佇日本中世紀(12-15世紀)出現、發展。親像記載儂名的 “交名注文"(kyō-myō chyu-mong);記載需要準備的物品詳細情形的 “支度注文"(sitaku chyu-mong);記載戰爭時受傷者儂名佮受傷狀況的 “合戰手負注文"(kassen teoi chyu-mong);記載斬取敵人首級的 “分捕頸注文"(bundori kubi chyu-mong)等攏是日本的古文書 “注文"。
漢字 “注" 有 “記載" 的古義。親像《三國志、蜀書、後主傳》: “國不置史,注記無官。" “文" 有文辭、文書的意義。所以,"注文" 就是有記載(儂名、物品名稱等)的文書,是日本儂佇中世紀時根據漢字的字義家己製造的漢字詞,毋是對漢語借去的漢語語詞。
尾矣日本進入近代商業時期,交易方式出現事先預訂(訂貨)的方式。這个(tsit4-e5)時陣買主需要對賣主提出記載欲(beh4)買物品的名稱、品質、數量等等的文書,這種文書亦叫做 “注文",因為這種文書的形式、內容佮古文書的 “注文" 差不多。
閣較尾矣,名詞的訂貨用的文書 “注文" 變做動詞,訂貨講 : “注文する"(chyu-mong suru),本來記載訂貨明細的 “注文" 改叫做 “注文書"(chyu-mong syo)。"注文書" 就是華語 “訂單",台語 “訂單(ting7-tuann1)"。

雖然二戰結束超過七十年,ui3(從)日語來的借詞 “注文[tsu3-bun5]" 佇(ti7;在)台灣猶原是活的語詞。親像 :
“若卜愛(nah8-beh4-ai3),趕緊扣(kha3)電話來「注文」。"
“前幾工,有佇F·B招伴的線頂「注文」一隻生(senn)仔鈷,日語【鐵瓶】。" (2017/03/12 曾江山先生貼文)。

佇料理店點菜嘛叫做 “注文"。
“走水轉來吳開利,看著金快笑微微,心內那想那佮意(kah4-i3),酒菜「注文」無停時。"—— <台南運河奇案>

廣告
本篇發表於 臺語文論集(本專題使用台語文書寫,標音採用……), [台灣話來自日語的借詞舉例] (本專題使用台語文書寫,標音採用...... ) 並標籤為 , , , , , , , 。將永久鏈結加入書籤。

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s