美麗意義的台語 sui2 的本字是 “嫷(媠)”

[ 美麗意義的台語 sui2 的本字是 “嫷(媠)” ]
(本篇使用台語文寫作,標音採用教育部《臺灣閩南語羅馬字拼音方案》)

華語 “美麗、漂亮”,台灣話講 “sui2”。過去有儂用 “水” 字記錄台語美麗意義的 sui2,親像 “水噹噹 [sui2-tang1-tang1]”。這大概是受着連雅堂《台灣語典》的影響。《台灣語典》卷一 :“水,美曰水。水色清而性潤,故假借。(按:詩家之稱美人曰如花,亦假借之名。)” “水” 字台語讀做 sui2 是文讀音,但是美麗意義的 sui2 是白話(口語),白話 sui2 假借 “水” 字的文讀音,是有小可勉強的講法。
六書的 “假借” 有 “本無其字的假借” 佮 “本有其字的假借”,無論佗一種的假借,假借字干焦借彼个字的音來記錄詞,假借字的本來的意義佮所記錄的詞的意義無關係。連雅堂既然講:“水色清而性潤”,用 “水(sui2)" 來表示美麗意義的台語 sui2,應該是比喻,毋是假借。
嘛有儂主張講 “秀” 字有美麗意義,台語 sui2 是 “秀” 字的台語讀音 siu3,因為音素換位作用變做 sui2,聲調自陰去轉做陰上,所以 sui2 的本字是 “秀” 字。
董忠司先生的《臺灣閩南語辭典》用 “媠” 字記錄台語美麗意義的 sui2,《教台典》嘛是用 “媠” 字,注明是替代字。但是《說文》講 “媠” 是 “憜” 的古文。《說文•心部》:“憜,不敬也。从心,𡐦省。《春秋傳》曰:‘執玉憜。’  惰,憜或省𨸏。媠,古文。” “媠” 字若照《說文》的解說, “媠” 是 “憜(惰)”,並無美麗的意義。

§《廣韻》記載的 “媠”:
《廣韻》對 “媠” 字記錄兩个音,意義無仝:
(1) 他果切(上聲、果韻、透母):“媠,好也。” “好” 佇古漢語是美麗的意思,就是台語的 sui2。毋過 “媠” 字的台語音,依照切語 “他果切” 讀是 tho2(華語讀做ㄊㄨㄛˇ)。
(2) 徒臥切(去聲、過韻、定母):“媠,嬾婦人也。” “嬾” 佮 “懶” 仝。“嬾婦人” 就是懶屍查某(lan2-si1-tsa1-boo2)。這个 “媠(徒臥切)” 對查某儂無公平,查埔儂嘛仝款有懶屍–的。切語 “徒臥切”,台語讀做 to7(華語:ㄉㄨㄛˋ)。這个 “媠(徒臥切)” 字佮 “惰” 字仝,亦就是《說文》講的 “憜” 的古文。
《廣韻》“媠(他果切)” 的美麗(好)意義有書證。三國、魏、曹子建(植)《七啓》:“收亂髮兮拂蘭澤,形媠服兮楊幽若。”  這裡面,“媠服” 的意義是華美的衣服(《辭源》),就是台語 sui2-sann1(衫)。猶閣有《列子•楊朱》:“穆之後庭,比房數十,皆擇稚齒婑媠者以盈之。” 服虔《通俗文》:“容麗曰媌,形美曰媠。”《辭源》:“婑媠,美好。”  婑,音ㄨㄛˇ。所以,在字義上,“媠” 字有台語 sui2 的意義,但是無 sui2 的音。

§ “媠” 是 “嫷” 的簡體字:
《辭源》講:“媠,或作嫷。”
《方言》卷二:“娃、嫷、窕、豔,美也。……南楚之外曰嫷,……。”  “美”,就是台語 sui2,所以,“嫷” 字有台語 sui2 的意義,是南楚之外的方言。《說文•女部》:“嫷,南楚之外謂好曰嫷。从女,隋聲。(臣鉉等曰:‘今俗省作媠,《唐韻》作妥,非是。’ 徒果切。)”  鉉就是現在通行本《說文》的校定者宋代的儂徐鉉。ui3 徐鉉的注解知影 “媠” 是 “嫷” 的簡體字。共 “嫷” 字簡化變做 “媠”,紲佮(sua3-kah4)“憜” 的古文 “媠” 仝字形。
“嫷”(美) 的書證有戰國、楚、宋玉《神女賦序》:“嫷被服,侻薄裝。”

§ “嫷” 的音義:
“嫷” 的意義就是台語 sui2,但是中古音韻書《廣韻》對 “嫷” 記錄兩个音,字義是 “美” 佮 “好”。“好” 佇古漢語的意義嘛是 “美”,就是台語 sui2。
(1) 徒果切(上聲、果韻、定母):“嫷,美也。《說文》曰:‘南楚人謂好曰嫷。 ’ ” 切語徒果切,台語讀做 to7(華語:ㄉㄨㄛˋ)。
(2) 湯臥切(去聲、過韻、透母):“嫷,好皃。” 切語湯臥切,台語讀做 tho3(華語:ㄊㄨㄛˋ)。
嫷字《說文》講 “从女,隋聲”,是形聲字,“隋” 是聲符。看着 “隋”,咱的直接反應是 “隋”(朝代名)佮 “隨” 台語讀做 sui5。sui5 佮 sui2,音倚倚,聲調無仝爾爾,但是《廣韻》對 “嫷” 字的注音却是 “徒果切”(to7)佮 “湯臥切”(tho3)。哪會按呢?這个問題牽涉着漢語語音的歷史演變佮上古漢語是毋是有 “複輔音聲母” 的問題。

§ 用複聲母解釋 “嫷” 字:
“複輔音聲母” 亦叫做 “複聲母”,意思是講上古漢語可能有 kl-、k‘l-、st-、pl- 等等的兩个輔音做聲母。親像 “閣” 佮 “洛”,中古音 “閣(古落切)” 是 k- 聲母,“洛(盧各切)” 是 l- 聲母,但是 “閣” 佮 “洛” 的聲符攏是 “各”,“各” 佇上古漢語的聲母是複聲母 kl-,才有可能𢓜中古音分化做 “閣(k-)” 佮 “洛(l-)”。其他,泣( k‘-):立(l-)表示 “立” 是複聲母 k‘l-;羶(s-):亶(t-)表示 “亶” 是複聲母 st-;筆(p-):律(l-)表示 “聿” 是複聲母 pl-;等等,種類誠濟。有真濟音韻學家主張上古漢語有複聲母。

“嫷” 是以 “隋” 做聲符的形聲字,咱來看以 “隋” 做聲符的字的中古音讀音是啥也款(採用《廣韻》反切。擬音依據郭錫良《漢字古音手冊》):
(1) 聲母是透母、定母的:
橢:他果切;t‘uɑ
嫷:湯臥切;t‘uɑ
墮:徒果切;duɑ
憜:徒果切;duɑ
嫷:徒果切;duɑ
隋:他果切;t‘uɑ
(2) 聲母是心母、邪母的:
䭉(𩞢):息委切;sĭwe
𣿂:息委切;sĭwe
隨:旬為切;zĭwe
隋:旬為切;zĭwe

遮的字的音變、音轉關係,請看下面的附圖。 中古端母(t-)、透母( t‘-)、定母(d-)三个輔音的發音部位相仝,會互相音轉,會使用 t- 來代表。心母(s-)佮邪母(z-)的發音部位相仝,仝款有音轉的條件,會使用 s- 來代表。


對頂面的以 “隋” 做聲符的字來看,“隋” 的上古音可能是一个複聲母 st-,才有可能𢓜中古時期有的讀做透( t‘-)、定(d-)母,有的讀做心(s-)、邪(z-)母。比較 “𣿂” 佮 “嫷”,聲符仝款是 “隋”,“𣿂” 的中古音是 “息委切”,台語讀做 sui2。因為 “嫷” 的聲符佮 “𣿂” 仝款是 “隋”,“嫷” 嘛有可能佮 “𣿂” 仝款讀做 “息委切”,台語讀做 sui2 。“嫷” 字佇中古音讀做 “息委切” ,中古韻書《廣韻》、《集韻》無記錄落來(因為是方言的關係),毋過有留佇台灣話的口語裡,漢語美麗台語講 sui2,sui2 就是 “嫷(息委切)”。美麗意義的台語 sui2 的詞源應該是漢代《方言》這本冊所講的 “嫷,美也。南楚之外曰嫷。”,sui2 的本字應該是 “嫷” 字。“嫷” 的俗字是 “媠”。
“隨” 本來寫做 “䢫”,從辵,隋聲。“隨” 意義的台語口語講 tue3 / te3 / ter3,聲母是 t-,這嘛可能佮聲符 “隋” 佇上古音是複聲母 st- 有關係。

§ 南楚之外 :
《方言》講:“嫷,美也。南楚之外曰嫷。” “南楚” 是 “包括(現在)湖南省衡陽、長沙以東,江西省南昌、九江及安徽省南部一帶。” 的地名(《辭源》)。ui3 地圖來看,“南楚之外” 包括江西省南部佮福建省,這一帶正是閩南語形成的所在。大陸本土閩南語傳來台灣了後發展變做台灣話。所以,美麗意義的台語 sui2 是"南楚之外" 的上古漢語 “嫷” 傳落來的。
“媠” 是 “嫷” 的俗字,是 “嫷” 的簡體字。“媠” 會容易 hong7 誤會是 “惰(憜)” 的古文。

本篇發表於 臺語文論集(本專題使用台語文書寫,標音採用……) 並標籤為 , , , , , , 。將永久鏈結加入書籤。

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s