臺語結構助詞 : kah

[ 臺語結構助詞 : kah ]
(本篇使用台語文寫作,標音採用教育部《臺灣閩南語羅馬字拼音方案》)

台語 “kah" 佇語法上是一个 “結構助詞",普通用佇連接形容詞、動詞佮補語,表示程度懸(kuân)或者是某種情態(情況、狀態)。這个(tsit-ê) “kah"《教台典》用 “甲" 字記錄。

§ 結構助詞 “kah" 連接程度補語
請觀察下面遮的短語。等號 ”=” 的正手爿是對應的華語。
(1)熱(jua̍h)kah欲死(beh-sí)=熱得要死;熱得要命。
(2)枵kah欲死=餓得要死;餓得不得了。
(3)疼kah欲死=痛得要死;痛得要命。(疼:thiànn)
(4)驚kah欲死=怕得要死。
(5)氣kah欲死=氣得要死;氣到不行。
(6)急kah欲死=急得要死。
(7)媠kah若啥(ná-siannh)=漂亮得什麼似的。
(8)歡喜kah若啥(ná-siannh)=高興得什麼似的。
頂面短語(1)、(2)、(3)的 熱、枵、疼 是 ”形容詞”, “欲死(beh-sí)" 是 ”程度補語”,"kah" 是 ”結構助詞”。"kah" 連接形容詞 熱、枵、疼 佮𢙠的補語 ”欲死(beh-sí)”,表示遮的 熱、枵、疼 的程度誠懸。
短語(7)、(8)的 媠(suí)、歡喜 嘛是 ”形容詞”,”若啥(ná-siannh)” 是程度補語,相當華語的 ”什麼似的”,嘛是表示程度懸的補語。
補語往往會使省掉,所以有:熱ka(jua̍h-ka)、枵(iau)ka、疼(thiànn)ka、媠(suí)ka、歡喜(huann-hí)ka 等的詞語。遮的陰平聲 ka (有當時仔短一屑仔)是陰入聲 kah 的音變。kah 的聲調是帶-h尾的陰入調,連讀變調時原則上變做陰上調,但是往往變做陰平調(有當時仔短一屑仔) 。親像 ”枵 kah 欲死”(iau kah beh-sí)的實際發音是 iāu# ka# be# sí#,本調陰入調 kah 佮 beh 攏變做陰平調。《教台典》的beh(欲)的連讀變調,有當時仔變做陰上bé,有當時仔變做陰平be。

§ 結構助詞 “kah" 連接情態補語
咱閣來觀察下面的短語:
(1)食kah足歡喜=吃得很高興;吃得很開心。
(2)洗kah誠清氣=洗得很乾淨。
(3)做kah流汗,嫌kah流瀾(nuā)=做得很起勁,卻得不到應有的讚賞。
(4)煩惱kah袂食袂睏=擔心得寢食難安。
(5)哭kah欲死欲活=哭得死去活來。
(6)驚kah phī-phī 掣(tshuah)=嚇得顫抖抖。
(7)氣kah𧿳𧿳(phu̍t-phu̍t)跳=氣得直跳腳。
(8)走kah phīnn-phēnn 喘=跑得上氣不接下氣。
(9)看kah霧sà-sà=看得不知所以然;霧裡看花。
(10)啉kah醉茫茫=喝得醉醺醺。
(11)媠kah若(ná)仙女下凡=漂亮得像仙女下凡。
(12)野kah若(ná)賊=粗魯得像賊一樣。
(13)忝kah會呼雞袂歕火=累得快沒氣了。(忝:thiám)
(14)無閒kah無暝無日=忙得不可開交;忙到日以繼夜。
(1)到(kàu)(10)的結構助詞 ”kah” 頭前的詞,食、洗、做、嫌、煩惱huânló等等是 ”動詞”, ”kah” 後面的詞、詞組是 ”情態補語”,表示動作的結果的情態(情況、狀態)。
(11)到(14)的結構助詞 ”kah” 頭前的詞, 媠、野、忝、無閒 等是 ”形容詞”,助詞 “kah" 後面的詞組、 熟語是 “情態補語",表示遮的 形容詞 所形容的情態。
觀察頂面遮的短語的結論是 : 台語 “kah" 是一个結構助詞, “kah" 連接形容詞、動詞佮補語,表示所形容的佮動作的程度懸佮情態。這个台語結構助詞 “kah" 相當華語的結構助詞 “得"。

§ 結構助詞 “kah" 的用字
連接動詞、形容詞佮補語的結構助詞 ”kah”,《臺日典》用 ”到” 字記寫,並且講,"kah" 是對 “kàu(到)" 演變來的。這應該有道理。 《臺日典》 佇「kàu(到)」條下舉的例有:”寒kàu欲死”、”講kàu喙酸”。這兩个例的 “kàu" 會使用 “kah" 代替,一般講:”寒kah欲死”、”講kah喙酸” 。所以 結構助詞 ”kah” 應該是對 “kàu(到)" 演變來的。若無,無法度連接表示程度、情態的補語。
《臺灣閩南語辭典》用 ”𢓜” 字記寫結構助詞 ”kah” ;《閩南方言大詞典》佮教育部《臺灣閩南語常用詞辭典》用 ”甲” 字記寫結構助詞 ”kah” 。”甲” 字無 kàu(到)的意義,用 ”甲” 字記寫結構助詞 ”kah” 是同音假借。

§ 結構助詞 “kah" 的本字探討
(一)𢓜
“𢓜" 有 kàu(到) 的意義。《廣韻、入聲、陌韻》小韻古伯切:”𢓜,至也。亦作假。" 古漢語 “至" 就是台語白話 kàu。"𢓜" 的中古音是 “古伯切",屬梗攝開口二等,中古音擬音[kɐk],現代台語讀做kik(華語 ㄍㄜˊ)。 “𢓜" 的中古音[kɐk] 的[ɐ](次低央元音)佮台語低元音 /a/ 倚倚,容易 [ɐ] > /a/ 。另外, 中古音[kɐk] 的韻尾[k]佮[u]的舌位真倚,-k 容易變做-u,親像 : 哭,khok/khàu;曲,khiok/khiau 。所以 “𢓜" 的中古音 [kɐk]會變做台語音 kàu。
另外一方面, “𢓜" 的中古音 [kɐk] 的韻尾-k弱化就變做-h,[kɐk] 就變成台語 kah。百,博陌切,白話音pah;拍,普伯切,白話音phah 等會使做旁證。
“𢓜" 字有kàu(到)的意義,閣有kah 的音,"𢓜" 是台語 結構助詞 “kah" 的本字 。
漢代的冊《方言》講:”假、𢓜、……,至也。 邠、唐、冀、兖之間曰假,或曰𢓜。……。" 可見 “𢓜" 是上古漢語的方言,台語 kàu、kah 應該是對上古漢語的 “𢓜" 傳–落來的。

(二)假
《方言》卷一:"假、𢓜、……,至也。" “假" 字郭璞注 : “音駕。" 《廣韻、陌韻》: “𢓜,至也。亦作假。" 所以,"假" 字應該嘛是台語結構助詞kah 的本字,差別佇 “假" 是陰聲韻,"𢓜" 是入聲韻。
《廣韻》對 “假" 字記錄兩个音,攏有 “至" 的意義:
(1)古疋切(上聲、馬韻):”假,且也;借也;非真也。《說文》又作徦,至也。……。”
(2)古訝切(去聲、禡韻):”假,借也;至也;易也;休假也。又古雅切。”
《方言》的 ”至” 意義的 ”假(音駕)” 佮《廣韻》的 ”至” 意義的 ”假(古疋切)”,《說文》寫做 ”徦”。 《說文、彳部》: “徦,至也。" 這个 “徦" 字徐鉉的注音是上聲 “古雅切",亦就是《廣韻》的 “古疋切"。所以會使講 “至" 意義的 “假" 佮 “徦" 是仝一个詞的無仝款寫法。因為 ”假” 字普遍用佇真假、假使、假定、假期等等,為著避免混亂,採用 “徦" 字來表示 ”至” 的意義較好。

(三)徦
“徦" 字《廣韻》無收錄,《集韻》有。《集韻》認為 “徦"、"假" 是 “𢓜" 的或體字。《集韻、入聲、陌韻》小韻各頟切;”𢓜,至也。或作佫、徦、假、臵。通作格。” 既然 “徦" 是 “𢓜" 的或體字(異體字), “徦" 的音佮 “𢓜" 仝款,佇台語是 kàu 佮 kah(參見頂面 “𢓜" 字的討論)。啊若照徐鉉對《說文》"徦" 字的注音, “徦" 字的音是 “古雅切",台語讀做陰上聲 ká。咱若注意聽 “熱kah欲死(jua̍h kah beh-sí)” 這个短語,連讀變調了後,伊的實際發音是:juà# ka# be# sí#。變調了後的第二音節 ka(ka1)# ,若共還原伊的本調,就是 ká(ka2)。所以原來大家認為的台語結構助詞 kah(kah4),講伊是 ká(ka2)(徦),嘛應該會通。親像短語 “熱徦欲死(jua̍h ká beh-sí)" ,若省略補語 “欲死",變做 “熱徦(juà# ka#), “徦" 的聲調維持佇變調的狀態 ka1,變調 ka1 的本調是 ka2。
雖然 《說文》 “徦" 字的注音是古雅切,台語讀做 ká(ka2),但是 《集韻》講 “徦" 是 “𢓜" 的或體字, “𢓜" 有 kah(kah4)的音,所以 “徦" 嘛有kah的音。連接動詞、形容詞佮補語的台語結構助詞是陰入聲 kah 已經約定俗成,不過 kah 的用字會使用本字 “徦" 字。按呢會當避免 “甲" 字意義的混亂,會使專字專用。
啊若 “到" 意義的台語kau3,會使用本字 “𢓜" 來寫。《教台典》考慮看覓。

§ 𢓜、格、徦、假 的書證
(1) 𢓜 : 無書證。
(2) 格
《集韻、陌韻》: ”𢓜,至也。或作佫、徦、假、臵。通作格。” 《爾雅、釋詁》: “格,至也。" 《爾雅、釋言》: “格,來也。" 其實,"格" 是 “各" 的假借字,佇金文,"各" 是 “至" 的意思。
“格" 字有書證 :
《書、舜典》: “光被四表,格于上下。"
《逸周書、成開》: “思若不及,禍格無日。"
《禮、月令》: “孟夏之月,行春令,則蝗蟲為災,暴風來格,秀草不實。" “來格" 就是台語 lai5-kau3 (來到)。
(3) 徦 : 無書證。
(4) 假
《廣雅、釋詁》: “假,至也。"
《詩、商頌、玄鳥》: “四海來假,來假祈祈。" “來假" 就是 “來格"。

廣告
本篇發表於 臺語文論集(本專題使用台語文書寫,標音採用……) 並標籤為 , , , , , , , 。將永久鏈結加入書籤。

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google+ photo

您的留言將使用 Google+ 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s