貢丸、貢糖

（原文發表於Facebook臺灣話資料交流所。作者劉建仁因身體因素，無法親自校稿。如有錯誤，敬請見諒。）

[ 貢丸、貢糖 ]

（本篇使用台語文寫作）

“貢丸（konɡ3-uan5）”是一種豬肉丸，因為佇製造過程有 konɡ3（華語搥打）的動作，所以叫做 konɡ3-uan5。konɡ3-uan5 寫做“貢丸”，“貢”是借音字，佮進貢無關係；“丸”是本字。
“貢糖（konɡ3-thnɡ5）”是一種塗豆糖，嘛是因為製造過程有 konɡ3（＝搥打）的動作，所以叫做 konɡ3-thnɡ5。雖然有人講因為貢糖好食，過去捌進貢予皇帝食，所以叫做“貢糖”，不過我認為 konɡ3-thnɡ5 的 konɡ3 應該是華語搥打意義的台語 konɡ3。
華語搥打意義的台語 konɡ3，一般用“摃”字書寫。但是“摃”即个字過去的字典、韻書攏無收錄，1990年的《漢語大字典》才有收。即本字典講，“摃” 佮“扛”是共款的字，華語讀做ㄍㄤ佮ㄎㄤˊ。“扛（ㄍㄤ）”就是台語的 knɡ1，猶若“扛（ㄎㄤˊ）”，台語講 ɡia5。由此可見，用“摃”字記錄台語 konɡ3（＝搥打），“摃”是閩南語方言字。
台語 konɡ3（＝搥打）有本字抑無？
《廣韻、去聲、曠韻》乎曠切：“攩，《廣雅》云：搥打也。”“擴，上同。”“擴”字現在台語讀做 khok4，是根據《集韻》闊鑊切讀的音，是另外一个詞。（乎曠切，國語讀ㄏㄨㄤˋ）。
對字義來講，“攩”、“擴”的意義是華語搥打，搥打就是台語的 konɡ3。對“攩”、“擴”兩字的聲符來看，一个是“黨”（台語 tonɡ2），另外一个是“廣”（台語 konɡ2），所以“擴（乎曠切）”佮台語 konɡ3，佇音韻上較倚。
“擴（乎曠切）”的反切上字“乎”佇中古音是匣母，匣母的字佇台語有真濟讀做 k- 聲母，親像：寒，kuann5；含，kam5；行，kiann5等等。所以“擴”字台語讀做 k- 聲母。
“乎曠切”屬宕攝開口一等，佇台語讀 -onɡ 韻母是常例規律，親像：當，tonɡ1；桑，sonɡ1；康，khonɡ1 等等。所以“擴（乎曠切）”讀 -onɡ 韻母。
反切“乎曠切”的反切上字“乎”是匣母，匣母反映佇台語聲調是陽聲調，但是 konɡ3 是陰去調，佮即个規律無合。但是，假使若台語 konɡ3（＝搥打）是上古漢語留落來的，聲調的無合規律應該會使接受，因為聲調分陰陽是中古以後發生的代誌。
綜合以上討論，“擴（乎曠切）”佇台語讀做 konɡ3，字義是搥打，所以“擴（攩）”是台語 konɡ3（＝搥打）的本字。（本文是探討本字，毋是欲改變用字）。