“鍋"–字的音

（原文發表於Facebook臺灣話資料交流所。作者劉建仁因身體因素，無法親自校稿。如有錯誤，敬請見諒。）

[ “鍋"–字的音 ]

（本篇使用台語文寫作）

“鍋"–字，1818年漳州音韻書《雅俗通》讀做 o1 一音；1820年漳州音韻書《增補彙音》讀做 o1 佮 ue1 兩音；1913年《厦門音新字典》讀做 ko1、o1、e1 三音；1954年偏漳腔台語韻書《彙音寶鑑》讀 o1、ue1 兩音。"鍋" 的泉州音是 er1，但是1800年的泉州音韻書《彙音妙悟》科（-er）韻下無收錄。
“鍋" 字的中古音是《廣韻》古禾切，平聲、戈韻、見母，果攝、合口、一等，擬測的中古音是 *kuɑ。"古禾切" 的反切下字 “禾" 台語讀做 ho5，因為反切上字 “古" 是全清見母，所以 “古禾切" 台語讀做陰平聲 ko1。這是讀書音。
“鍋"，台語哪會讀做 “零聲母" 的 o1、ue1、e1、er1？聲母 k- 哪會無–去？
“鍋" 是以 “咼" 為聲符的形聲字。以 “咼" 為聲符的形聲字有的讀做見（*k-）母（蝸、過、鍋……）；有的讀做影（*ʔ- ）母（𠷏，於詭切）；有的見（*k-）、影（*ʔ-）母兩讀（渦，古禾切、烏禾切）。嚴學窘先生佇〈原始漢語複聲母類型的痕迹〉（收錄佇《古漢語複聲母論文集》，北京語言文化大學，1998年）講，**ʔk- 是原始漢語複聲母類型的一種，並且以 “𠷏：咼" 做證據的一个例（𠷏，於詭切，影母。咼，苦緺切，溪母）。
因為以 “咼" 為聲符的形聲字佇原始漢語是複聲母 **ʔk-，𢓜中古時期就分化做 *ʔ-（影母）佮 *k-（見母）。中古影母字現代台語讀做零聲母。
“鍋" 佇原始漢語應該嘛是複聲母 **ʔk- 的字（詞），𢓜中古時期分化做 *k-（見母）佮 *ʔ-（影母）兩个音 ，讀見母的音《廣韻》記做古禾切（*kuɑ），讀影母的音（*ʔuɑ？）韻書無記錄，但是由古代漢人的口語帶來福建南部（閩南），閣再自閩南帶來台灣，所以 “鍋" 佇台語就有零聲母的 o1、ue1、e1、er1 的音。遮的音應該是中古音 *ʔuɑ 的音變。
用 “鍋"–字書寫台語炊器意義的 ue1、e1、er1，"鍋" 是本字，毋是替代字。