「人（lânɡ）」佇臺語的用法

（原文發表於Facebook臺灣話資料交流所。作者劉建仁因身體因素，無法親自校稿。如有錯誤，敬請見諒。）

[「人（lânɡ）」佇臺語的用法 ]

（本篇使用台語文寫作）

「人（lânɡ）」是啥？「人（lânɡ）」是（華文）「 具有高度智慧和靈性，且能製造並使用工具以進行勞動的高等動物。」（《教育部重編國語辭典修訂本》）。 「人（lânɡ）」 基本上是名詞，但是嘛做代詞用。「人」做代詞用的時「人」的聲調固定變做陽去聲 lānɡ，這是陽平聲 lânɡ 的變調，用 lānɡ* 表示。下面分別說明。

A. 名詞的「人（lânɡ）」
A.1. 做複合詞的語素
（1）佮國名或者地域名結合，造成偏正式複合詞，表示某一族群的人。親像：
美國人、法國人、日本人、西洋人、香港人、山東人、上海人、台灣人、台北人、台中人、高雄人、……
（2）佮名詞、形容詞、動詞短語結合，造成偏正式複合詞，表示某一類人或者人群。親像：
老人、少年人、查某人、查埔人、好額人、散赤人、讀冊人、生理人、好人、歹人、熟似人、生份人、食頭路人、……
A.2. 「人」做主語（"人" 維持本調）
（1）人無十全（lânɡ bô tsa̍p-tsn̂ɡ）。
（2）人咧做，天咧看。
（3）人濟，話就濟。
（4）這幾工我人無爽快。（「人無爽快」是主謂短語，做「我」的謂語，）
（5）人來才（tsiah）掃地（tè），人去才煎茶。
A.3. 「人」做賓語
（1）扑人喝救人。
（2）做牛著拖，做人著磨。
（3）輸人毋輸陣。
（4）有人佇–e0–無？
（5）伊毋是人。
A.4. 「人」做定語。愛綴「的（ê）」
（1）人的一生親像眠夢。
（2）人的欲望無底止（bô-tí-tsí）。
（3）人的生活靠拍摒。

B.「人（lānɡ*）」做代詞。代詞「人（lānɡ*）」指講話的人佮聽話的人以外的人。
B.1. 「人（lānɡ*）」泛指第三人稱。
（1）人（lānɡ*）講廖添丁是義賊。
（2）人（lānɡ*）都共伊會失禮矣，伊猶閣毋放人（lānɡ*）煞。
（3）聽人（lānɡ*）講你搬新厝矣，有影–無？
（4）人（lānɡ*）講明仔再總統會來咱遮。
（5）人（lānɡ*）食飽閒閒無代誌，我一日到暗無閒 tshih-tshih。
（6）俗語人（lānɡ*）咧講：「一枝草，一點路。」（"人（lānɡ*）咧講" 是主謂短語，是主語 “俗語" 的謂語）
B.2. 「人（lānɡ*）」明指第三人稱。
（1）人（lānɡ*）阿明足有禮貌，拄著人攏會相借問。
（2）人（lānɡ*）阿英足𠢕讀冊，見若考試攏考第一名。
B.3. 「人（lānɡ*）」指第一人稱我。
（1）人（lānɡ*）無愛去，硬欲叫人（lānɡ*）去。
（2）丈人的生日人（lānɡ*）我嘛有去共祝賀。
（3）你免閣講矣，人（lānɡ*）無愛聽。
B.4. 「人（lānɡ*）」佇一寡動詞後面做賓語時，「人（lānɡ*）」讀輕聲，輕聲的調值隨前字的聲調變動，或者攏讀lànɡ＊。（＊表示變調後的調類）
（1）錢借–人（lànɡ＊），討袂轉–來。
（2）叫–人（lànɡ＊）僫等，家己做較快。
（3）阮查囝已經做–人（lànɡ＊）矣。
（4）阿芳有幾若間厝租–人（lanɡ＊／lànɡ＊），收入袂少。
（5）隔壁彼个阿婆足愛罵–人（lānɡ＊／lànɡ＊），逐个都予罵有著。
（6）熱–人（lànɡ＊）。
（7）寒–人（lànɡ＊）。